წახალისება ადამიანს არ სჭირდება, რომ მოტივაცია მისცე? – ზავრადაშვილი საჯარო მოხელეებისთვის ხელფასების მატებაზე

ქართული ოცნების დეპუტატი ირმა ზავრადაშვილი მიჩნევს, რომ საჯარო მოხელეების ანაზღაურება საკმაოდ მწირია იმასთან შედარებით, რასაც ისინი აკეთებენ.

მისივე თქმით, მათ წახალისება და მოტივაცია სჭირდებათ, რათა მომავალში უფრო მეტი გააკეთონ.

„იცით როგორ მუშაობს საჯარო მოხელე? მას ანაზღაურება არ სჭირდება? ისიც ხომ იგივე ადამიანია როგორც თქვენ და დანარჩენი არასაჯარო მოხელეები არიან? თუკი მას შეუძლია და არ ევალება ხალხის სამსახურში იდგეს 6 საათის და 12 საათის შემდეგ, ცაში იყურებოდეს წვიმა რომ მოვა, ქუჩაში უნდა იაროს, ვიღაცას ზედმეტად არ დაეტბოროს რამე, ფოთოლი არ ჩამოვარდეს და არ დარჩეს. მას გარდა იმისა, რაც 9-დან 6-მდე ანაზღაურება ეკუთვნის, მწირია იმასთან შედარებით, რასაც აკეთებს.

საჯარო მოხელის შრომა დაფასებული არ უნდა იყოს? რახან საჯარო მოხელეა დამნაშავეა? მისი შრომა არ უნდა იყოს ანაზღაურებული? წახალისება ადამიანს არ სჭირდება, რომ მოტივაცია მისცე, რათა იმაზე მეტი გააკეთოს, რასაც ანაზღაურების გარეშე აკეთებს წლების განმავლობაში? გაცილებით უფრო ნაკლები ხელფასი აქვთ, ვიდრე 9 წლის წინ საჯარო მოხელეს ჰქონდა. ის ადამიანი არ არის? თუ ამ ხელისუფლების დროს სხვანაირი საჯარო მოხელეები არიან და წინა ხელისუფლების დროს სხვანაირი მოხელეები იყვნენ?“, – ამბობს ზავრადაშვილი მეტრონომთან საუბარში.

პრემიერის ირაკლი ღარიბაშვილის თქმით, საჯარო სამსახურებში 2022 წლიდან ხელფასები გაორმაგდება.