“ვზივარ და ვსკდები ტირილით! – მდიდარი ადამიანი ხარ შენი მეგობრობის და სიყვარულის უნარით” – რას წერს ირაკლი კაკაბაძე ლევან ვასაძეზე

მწერალი ირაკლი კაკაბაძე სოციალურ ქსელში პარტია “ერის” ლიდერის, ლევან ვასაძის ჯანმრთლობის შესახებ ემოციურ პოსტს აქვეყნებს, სადაც ის წერს, რომ არა მარტო ილოცებს, არამედ ყველაფერს გააკეთებს იმისთვის, რომ მისი სიცოცხლე მეტ ხანს გაგრძელდეს. 

ამასთან, კაკაბაძე თავის პოსტში ამბობს, რომ ის ლევან ვასაძეს მისი პოლიტიკური შეხედულებების გამო არ აფასებს და მას მხოლოდ მისი საოცარი ადამიანობით აფასებს. მწერალი ამავე პოსტში 1989 წლის 9 აპრილს იხსენებს და დასძენს, რომ მაშინ 19 წლის ლევან ვასაძემ საკუთარი თავი სრულიად დაივიწყა და რუსთაველის გამზირზე დაცემულ გმირ ქალებს გადარჩენისთვის ეხმარებოდა. 

“ეს არის ჩემი ადამიანური ვალი და ძალიან დიდი ტკივილი.  ლევან ვასაძე ჩემი ძალიან დიდი ხნის მეგობარია. მე მას მისი პოლიტიკური შეხედულებების მიხედვით არ ვაფასებ, ისევე როგორც ბევრ ჩემს მეგობარს, ჩემს ნათესავს.  მე მას მისი საოცარი ადამიანობით ვაფასებ.   რადგან ჩემი თვალით მაქვს ნანახი ბევრი სიკეთე, რომელც ამ ადამიანს გაუკეთებია. 

პირველი ესეთი უანგარო სიკეთე მე 1989 წლის 9 აპრილს ჩემს თავზე გამოვცადე, როცა გაგიჟებულ გაშმაგებული საბჭოთა ჯარისკაცების ორვეს ერთად გვკლავდნენ, იმისათვის რომ ჩვენ წაქცეული ქართველი გმირი ქალების წამოყენებას ვცდილობდით რუსთაველის გამზირზე.  ამ მომენტში მე ვნახე ადამიანობის ნამდვილი მაგალითი, როდესაც 19 წლის ლევანმა თავისი თავი სრულიად დაივიწყა, ჯერ დაცემული გმირი ქალების წამოსაყენებლად და ბევრ მათგანს სიცოცხლეც გადაურჩინა ჩემს თვალწინ.  და ბოლოს, მეც დამეხმარა – შორიდან გადამეფარა, როცა ჩემს მოსაკლავად გამოქანებული ნიჩაბი დაინახა. 

ამის მერე მან ორჯერ სიკვდლისგან იხსნა ჩემ საყვარელი და.  და ძალიან ბევრ მეგობარს დაეხმარა.  მე ამის დავიწყება არასდროს არ შემიძლია – მე ჩემი ძმა ლევან ვასაძე ადამიანურად ისევე მიყვარს და უფრო მეტადაც, ვიდრე ადრე.  ახლა, ამ მართლაც საშნელი განსაცდელის ჟამს მე მინდა მას ვუთხრა რომ მე მთლიანად მის გვერდზე ვარ, როგორც ბევრი სხვა ადამიანი, მუხედავად მათი აღმსარებლობისა, ეროვნებისა თუ ორიენტაციისა.  

ლევან, შენ მდიდარი ადამიანი ხარ შენი მეგობრობის და სიყვარულის უნარით – და მე დარწმუნებული ვარ რომ შენ არანაირ ძალადობაში არც ჩაერეოდი აქ რომც ყოფილიყავი, იმიტომ რომ ჩემი თვალით მაქვს ნანახი 1989 წლის 9 აპრილს როგორი ნამდვილი თავდადებით ეხმაებოდი შენს ჩაგრულ გმირ ქალებს, რომელთაც საქართველოს თავისუფლება მოუტანეს.  

მე, როგორც იცი, არ მიყვარს ტყუილი სიტყვების თქმა და მინდა პირდაპირ გითხრა რომ ვზივარ ახლა ჩემს მაგიდასთან და ვსკდები ტირილით.  მე შენთვის არამარტო ვილოცებ, ჩემო საყვარელო ძმაო – არამედ ყველაფერს გავაკეთებ რომ შენი სიცოცხლე რაც შეიძლება მეტ ხანს გაგრძელდეს.  ჩემთვის შენ მრავალ ნიჭთან ერტად მთავარი ნიჭი შენი სიყვარულის ნიჭია და სხვა ადამიანისთვის თავდადების ნიჭი.  სიყვარული კი არის ღმერთი – როგორც ამას ამბობენ.

შეგახსენებთ, რამდენიმე დღის წინ პარტია “ერის” ლიდერმა, ლევან ვასაძემ სოციალურ ქსელში მორიგი ვიდეო-მიმართვა გაავრცელა, სადაც მისი ჯანმრთელობის მდგომარეობაზე საუბრობდა. აღნიშნულ ვიდოში ის ამბობს, რომ მისი ამჟამინდელი დიაგნოზია “აელ” ტიპის ამილოიდოზი, რომელიც მილიონი კაციდან მხოლოდ ორს ემართება.