5 გრამზე მეტი მარიხუანის შეძენა-შენახვაზე 6 წლამდე პატიმრობა დაგეკისრებათ, ჩანაცვლებითი თერაპიის პროგრამებს და ფსიქოტროპულების იმპორტს მხოლოდ სახელმწიფო განახორციელებს – „ოცნებამ“ ნარკოპოლიტიკა გაამკაცრა.
დღეს, 2 ივლისს ცვლილებები დაჩქარებული წესით, მეორე და მესამე მოსმენით მიიღეს. მესამე მოსმენაზე კანონპროექტს მხარი ივანიშვილის 82-მა დაუჭირა, წინააღმდეგი არავინ ყოფილა.
ცვლილებებით, გამკაცრებული ნორმები შეეხება მცენარე კანაფის მოყვანასა და კულტივაციასაც. კერძოდ, 155 გრამამდე მცენარე კანაფის მოყვანისთვის განისაზღვრება 6 წლამდე თავისუფლების აღკვეთა, ან საზოგადოებისთვის სასარგებლო შრომა ან შინაპატიმრობა.
ასევე, ნარკოტიკული საშუალების შემცველი მცენარის უკანონო დათესვა, მოყვანა ან კულტივირება – ისჯება ჯარიმით ან საზოგადოებისთვის სასარგებლო შრომით ვადით 200-დან 400 საათამდე ან შინაპატიმრობით ვადით 6 თვიდან 2 წლამდე ანდა თავისუფლების აღკვეთით ვადით 2-დან 6 წლამდე. მკაცრდება სასჯელი კანაფის თესლის გაყიდვისთვისაც.
ახალი კანონით მიხედვით, სპეციალურ კონტროლს დაქვემდებარებულ ნივთიერებათა საბითუმო რეალიზაციის და ნარკოტიკული საშუალებებისა და ფსიქოტროპული ნივთიერებების იმპორტის უფლება მხოლოდ შესაბამისი ნებართვის მქონე იმ იურიდიულ პირს ექნება, რომელიც დაფუძნებულია სახელმწიფოს ან სახელმწიფოს მიერ დაფუძნებული/სახელმწიფოს მართვაში მყოფი იურიდიული პირის მიერ, კანონმდებლობით დადგენილი დოკუმენტაციის საფუძველზე.
საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი უფლებამოსილია, საჭიროების შემთხვევაში, ნარკოტიკული საშუალებებისა და ფსიქოტროპული ნივთიერებების იმპორტის განხორციელების უფლება მიანიჭოს სხვა იურიდიულ პირს.
კანონით, ასევე განსაზღვრულია, რომ ოპიოიდური ჩანაცვლებითი მკურნალობის განხორციელენბაც მხოლოდ მთავრობის უფლებამოსილება გახდება, ხოლო კერძო სუბიექტებს ჩანაცვლებითი თერაპიის განხორციელება სრულად ეკრძალებათ.
კომენტარები