ლევან ცუცქირიძე ,,ქართული ოცნების” ლიდერების განცცადენას საქართველოს მიერ ომის დაწყებასთან დაკავშირებით, ვრცელი პოსტით პასუხობს:
„1. რუსეთის პრეზიდენტი რომ შენს პრეზიდენტს ეტყვის: კოსოვოზე პასუხს საქართველო მიიღებს, მაგრამ ეგ შენი პრობლემა არ არისო (?), ესე იგი ომი მზადდება.
2. სამაჩაბლოსა და აფხაზეთში რომ რუსულ პასპორტებს დაარიგებ, რკინიგზას რომ განაახლებ, ახალ შეიარაღებას რომ შეიტან და უსაფრთხოების დოქტრინაში რუსების მთელი მსოფლიოს მასშტაბით დაცვას ჩაწერ, ომი მზადდება.
3. რუსი დიპლომატები რომ ევროპელებს ეუბნებიან დროზე მოინახულონ საქართველო, თორემ მერე გვიან იქნება, ომი მზადდება.
4. მთებში ფრენის გამოცდილების მქონე მფრინავებს რომ აგროვებ, ომი მზადდება.
5. ყველა ქართულ სამშვიდობო ინივიატივას რომ დაბლოკავ, ომისთვის მზადებაა.
6. 40.000 რუსი სამხედროს საქართველოში რამდენიმე დღეში შემოყვანა ფიზიკურად შეუძლებელია, თუკი ომისთვის არ ხარ მზად.
7. მეორე სახელმწიფოს მთავარ მომლაპარაკებელს „საბურავი რომ დაეშვება“ და სამშვიდობო შეხვედრაზე „ვერ მოვა“, ომი უნდა.
8. 50-მდე რუსი ჟურნალისტი ომის დაწყებამდე რამდენიმე დღით ადრე ცხინვალის ერთი და იმავე სასტუმროში შემთხვევით ვერ აღმოჩნდება, თუკი ომის დაწყება გადაწყვეტილი არ გაქვს.
9. სამხედრო წვრთნის მონაწილეებს რომ ბროშურებს ურიგებ, სათაურით „მეომარო: იცნობდე შესაძლო მტერს!“, სადაც ქართული არმიის აღწერაა, ომს იწყებ.
10. სხვა ქვეყნის თვითმფრინავი რომ შემოფრინდება შენს საზღვრებში და ბომბს გესვრის, ომის დაწყებაა.
11. ქალაქის ტერიტორიიდან მოსახლეობის ორგანიზებულ გაყვანას ევაკუაცია ჰქვია და ხშირად ომისათვის მზადებას უძღვის წინ. როცა ცხინვალში ევაკუაცია ცხადდება, ომიც იწყება.
12. სამშვიდობოების პოზიციიდან კონფლიქტის ზონაში აკრძალული იარაღით რომ გესვრიან, ომის დაწყებაა.
13. სხვა ქვეყნის ტერიტორიიდან შეიარაღებული სამხედროები რომ შემოდიან, ომის დაწყებაა.
14. ომის დაწყებას მობილიზება სჭირდება: ქართული შეიარაღებული ჯარების ხუთი ბრიგადიდან I ბრიგადა ერაყში იყო; II ბრიგადა, ერაყიდან ახალ დაბრუნებული – სენაკში, III და IV ბრიგადები ერაყისთვის წვრთნაზე ქუთაისში, V ბრიგადა კი ძირითადად საწვრთნელი ბრიგადა იყო. რუსული არმია კი, რომელმაც სწორედ მაშინ დაასრულა საბრძოლო წვრთნები, როკის გვირაბთან იდგა.
15. ომის დაწყებას შესაბამისი წვრთნა და აღჭურვა სჭირდება, ქართული შეიარაღებული ძალების მომზადება არ იყო გათვლილი ტერიტორიულ ოპერაციებზე; რუსული ძალები კი ჩრდილო კავკასიაში სწორედაც რომ მეზობელ სახელმწიფოში შეჭრის ოპერაციისთვის ვარჯიშობდნენ და შესაბამისი ტექნიკაც იქვე ჰქონდათ.
16. ომს (სამხედრო კონფლიქტს) აქვს თავისი განმარტება. ეს ყველგან წერია – წიგნებში, რომლებიც ბიბლიოთეკებშია და ვიკიპედიაშიც კი, რომელიც ინტერნეტშია! საქართველოსა და რუსეთის ფედერაციას შორის ომი საუკუნეების წინ კი არა, 2008 წლის 7 აგვისტოს დაიწყო.
17. 08-08-08 მარკეტინგულად კარგად ჩანს, მაგრამ სიმართლე უფრო მნიშვნელოვანია, ვიდრე მარკეტინგი: ომი 7 აგვისტოს დაიწყო, რუსეთის რეგულარული არმიის ნაწილების მასიური შემოჭრით საქართველოში.
18. ძალიან სუსტი ქვეყანა ძალიან ძლიერის წინააღმდეგ ომს მხოლოდ მაშინ მიმართავს, როცა თავს ესხმიან და ომი ის ბოლო არჩევანია, რომელიც სასიცოცხლო დროის მოსაგებად სჭირდება.
19. საკუთარ ქვეყანაში უცხო ქვეყნის უკანონოდ შემოსული არმიის წინააღმდეგ ომს ვერ დაიწყებ, თავი უნდა დაიცვა.
20. 1-ში რომ გესვრიან, 2-ში რომ გესვრიან, 3-ში რომ გესვრიან, 4-ში რომ გესვრიან, 5-ში რომ გესვრიან, 6-ში რომ გესვრიან და 7-ში შენც რომ ესვრი, ეს ომის დაწყება კი არა, სამართლიანი თავდაცვაა.
21. და ბოლოს, შენ როგორ მოიქცეოდი 2008 წლის აგვისტოში?”.
კომენტარები