რა ექსკლუზიური ამბები მოაწოდეს “ალიას” კობა კობალაძის შვილის საქმეზე?

„ქართული ოცნების“ დეპუტატის, კობა კობალაძის შვილის, დავით კობალაძის შესაძლო მონაწილეობაზე 24 ივნისს ასათიანის ქუჩაზე მომხდარ ინციდენტთან დაკავშირებით, ინფორმაცია გვქონდა და მოკვლევასაც ვაწარმოებდით. თუმცა, ერთ-ერთმა ტელევიზიამ დაგვასწრო და ფაქტი ეთერით გააშუქა. შესაბამისად, არ გვაქვს პრეტენზია ექსკლუზივზე და კარგი იქნება, თუ ტელევიზიები არც თუ იშვიათად, ჩვენი გაზეთიდან წაღებულ ინფორმაციას ექსკლუზივად თუ არ გაასაღებენ. თუმცა, ეს ის შემთხვევაა, როცა კონკრეტულ ტელევიზიას რამდენიმე ფაქტი გამორჩა, უფრო ზუსტად კი, ჩვენ იმაზე მეტი ვიცით, ვიდრე ტელევიზიით გაჟღერდა. აქვე გეტყვით, რომ ჩვენი წყარო ძალოვანი უწყების (არ ვაკონკრეტებთ რომლის) ერთ-ერთი მაღალჩინოსანია.


თავიდან დავიწყოთ. 24 ივნისს, თბილისში, ასათიანის ქუჩაზე, რამდენიმე პირი ბანკის თანამშრომელს ფიზიკურად გაუსწორდა. რამდენიმეს პირობითად ვამბობთ, თორემ ბანკის თანამშრომელი შვიდმა ახალგაზრდამ სცემა. გარდა იმისა, რომ მას დანით ფეხის არეში მიაყენეს ჭრილობა და იგივე დანის ტარი თავში ურტყეს, საქმეში ფიგურირებს ცეცხლსასროლი იარაღიც. როგორც წყარო ამბობს, რომლის ინფორმაცია ხშირ შემთხვევაში, ასპროცენტიანი სიზუსტით ცხადდება, თუმცა, მის უტყუარობაზე მტკიცებით ფორმაში ვერ დავწერ, ახალგაზრდებმა მანქანიდან გადმოიღეს ე.წ. „ვინჩესტერის“ ტიპის ცეცხლსასროლი იარაღი და მისი ტარითაც მიაყენეს დაზარალებულს დაზიანებები. ამას გარდა, იარაღის ლულა კბილებში მიაბჯინეს, რათა შეეშინებინათ. ეს ყველაფერი კი იმ კამერებზე ჩანს, რომელიც ასათიანის ქუჩაზე მრავლად იყო და რომლებმაც ყველაფერი აღბეჭდეს.


ჩვენი წყაროს ინფორმაციით, სამართალდამცავებს მომხდარზე მყისიერი რეაგირება ჰქონდათ და ეჭვმიტანილები მაშინვე დააკავეს იარაღთან ერთად, თუმცა, მას შემდეგ, რაც გაირკვა, რომ დაკავებულთაგან ერთ-ერთი გენერლის და მოქმედი დეპუტატის, კობა კობალაძის შვილი იყო, ხოლო „ვინჩესტერი“ უშუალოდ დეპუტატზე გახლდათ გაფორმებული, საქმე თავდაყირა დადგა.

პირველ რიგში, საერთოდ გაქრა იარაღი და როგორც გვეუბნებიან, ვიდეოთვალზე ეს იარაღი კარგად ჩანს, უბრალოდ საქმეში არ დევს. დაზარალებულის ოჯახი პირადად მოინახულა გენერალმა კობალაძემ და მათ დუმილის სანაცვლოდ ყველანაირი დახმარება აღუთქვა, თუმცა დაზარალებულის ჯანმრთელობის მდგომარეობა იმაზე მძიმე აღმოჩნდა, ვიდრე ერთი შეხედვით ჩანდა. ბანკის თანამშრომელს აქვს ტვინის შერყევა და თავის ქალის ძვალი აქვს დაზიანებული.

შემდეგ, საქმეში ჩაერთო მეორე გენერალი, ბატონი ვახტანგ გომელაური. შს მინისტრი კობალაძესთან ერთად, გენერალთა კლუბის წევრი და მეგობარია. შესაბამისად, მან მეგობრის შვილი არ გაიმეტა და საქმის შერბილება (სულ ჩაფარცხვა არ გამოდიოდა სწორედ სათვალთვალო კამერების გამო) გადაწყდა. თუმცა, აქ კიდევ ერთმა პრობლემამ იჩინა თავი – საქმის გამომძიებელს ყველაფერი პროფესიონალურ დონეზე ჰონდა შესრულებული, ანუ იმ დღევანდელი დაკითხვის ოქმები, დაზარალებულის ჩვენება, ეჭვმიტანილების დაკითხვის ოქმი. შერბილება აღარ გამოდიოდა, მითუმეტეს მაშინ, როცა გამომძიებელი მიხვდა, რომ ყველაფრის ახლიდან გადაწერა და შემდეგ ამ საქმის ამოტივტივება მას კარგს არაფერს უქადდა.


„იმ გამომძიებლის წინააღმდეგ, ერთ-ერთ დაკავებულს დააწერინეს საჩივარი, თითქოს ჩხრეკის დროს გამომძიებელმა და მისმა თანაშემწემ, უშუალოდ გამომძიებლის მითითებით, მას გამოძიებისთვის საჭირო მტკიცებულება ჩაუდეს. გენერალურმა ინსპექციამ უფლებამოსილების გადამეტების ბრალდებით სისხლის სამართლის საქმე აღძრა და გამომძიებელიც იძულებული გახდა, საქმე თაროზე შემოედო“,-გვეუბნება ძალოვანი უწყების მაღალჩინოსანი.


მას შემდეგ კი, რაც მომხდარი ინციდენტი გახმაურდა, გენერალი კობალაძე იძულებული გახდა, შვილი თავისი ხელით მიეყვანა განყოფილებაში, თუმცა ეს იმას არ ნიშნავს, რომ ის დააკავეს. დაკითხვის შემდეგ დავით კობალაძე შინ გაუშვეს და როგორც გვეუბნებიან, ყველაფრის მიუხედავად, ის ამ საქმიდან მშრალი ამოვა. გენერალი კობალაძე მმართველ გუნდს ამ საარჩევნოდ ძალიან სჭირდება. საქმე ისაა, რომ გენერალ დევი ჭანკოტაძის პოლიტიკაში მოსვლისა და „ნაციონალური მოძრაობის“ მხარეს დადგომის შემდეგ, „ოცნებას“ მის საპირწონედ სწორედ კობალაძის დარი ავტორიტეტი ესაჭიროება. ამიტომ, მის შვილს არავინ გაიმეტებს და ზოგადად, რადგან მომჩივანი რეალურად არ არსებობს, მომხდარის გამო გისოსებს მიღმა არავინ აღმოჩნდება. თუმცა,  რა მოხდება იმ შემთხვევაში, თუ სათვალთვალო კამერების ჩანაწერები იხილავს დღის სინათლეს და თუ იქ მართლა გამოჩნდება „ვინჩესტერი“, ნამდვილად ვერ გეტყვით. თანაც, თუ ჩვენი წყაროს მიერ მოწოდებული ინფორმაცია მართალია და „ვინჩესტერი“ კობა კობალაძის კუთვნილებაა, საქმე შესაძლოა თავდაყირა დადგეს.

ანი დვალიშვილი, ალია №23

  •  
  •  

კომენტარი

  1. datiko48

    რა ნაძირლებითაა საქართველო სავსე,დამნაშავეა?უნდა დაისაჯოს,აღზარდეთ შვილები ქართველი მართლმადიდებელი ადამიანის სულიერებით,ნუ ყიდით სულს 30-ვერცხლად,დაგიბრუნდებათ უკან ის ბოროტება რაც ჩაიდინეთ ყველამ!!!

  2. ანონიმური

    ფუ რა მარაზმში ვცხოვრობთ.

  3. ანონიმური

    ანუ სულ იმის შიშის ქვეშ უნდა ვიყო,რომ ასეთი ბობოლების შვილებთან კონფლიქტი არ მოუხდეს ჩემს შვილებს და არ დამიჩაგრონ,არ დამიზიანონ?მყრალი მასით სავსე ქვევრში ვცხოვრობთ და ჩვენი,მოსახლეობის ბრალია მათი ასეთი სიმყრალე და გაუთავებელი თავის დაძვრენა ნებისმიერი კატასტროფული სიტუაციიდან.არც ნაცები აკლებდნენ და ამათ საერთოდ აიღეს თავზე ხელი.გარშემო უვიცთა აღლუმია,არსად არაფერი აღარ მუშაობს გამართულად,პროტექციამ წალეკა ყველაფერი.

  4. ანონიმური

    მინისტრების დონეზე რომ იქნება დანაშაულის ჩადენა, რამეთუ, დანაშაულის დამალვა კანონით სისხლის სამართლის დანაშაულია. და თან პროფესიონალ გამომძიებელს რომ დააშანტაჟებ იქეთ, იმ ქვეყანას ქვეყანა ქვია საერთოდ?!

  5. ანონიმური

    ეს ნაძირლები სუფრაზე კაცობის სადრეგრძელოების თქმას რომ დაიწყებენ. ეს ტანით დიდი და კაცობით პატარა კაცი.

  6. ანონიმური

    ამათ რო უყურებ სულ ძველი ლათინო ამერიკა და ბაუტისტა მაგონდება

  7. ###

    აი რატომ ვერ მოქმედებენ საგამოძიებო სტრუქტურები ეფექტურად, იქაც არიან უნიჭიეტესი, თავის საქმის პროფესიონალი და თავდადებული ადამიანები, მაგრამ გასაქანს არ აძლევენ ესეთი ლეშები, ფუი მაგათ გენერლობას

  8. ანონიმური

    ყოჩაღ, ანა!

  9. ანონიმური

    კობალაძე მხოლოდ იმით შეინარჩუნებს პატივისცემას და სახელს, (რასაც ნამდვილად იმსახურებს და აქვს) თავის უვარგის შვილს რომ გაუშვებს იქ, სადაც იმსახურებს, თან ჭკუასაც ისწავლის ის თავხედი, მამის პრესტიჟს რომ ჩირქი მოსცხო. მეწყინა, იმიტომ რომ კობა არ არის ცუდი პიროვნება. ყოვლად მიუღებელია საგამოძიებო საქმიანობაში მთავრობის ვირთხების ძრომიალი და დალაგებები. სოხუმელი.

    1. იოსები იბესოი

      სოხუმელო ერთმა კოვზმა კუპრმა, მთელი კასრი თაფლი გააფუჭა. რუსულად მაინც არ გაგიგია? ადამიანი მკვლელს რომ გაზრდის, იმან ყველაფერ დანარჩენს ხაზი გადაუსვა!! ან თავი უნდა მოიკლას, ან…
      ვაჟა ფშაველა გვყავს… გადაიკითხე

  10. კატო

    ქართველმა ხალხმა ეს უნდა დაგმოს!!!! გაწყდა ახალგაზრდობა! მფარველობას და ხელის დაფარებას შეეწირა არაერთი ადამიანის სიცოცხლე. სანამდე უნდა ვითმინოთ ეს განუკითხაობა, როდისმე ხომ უნდა დამთვარდეს ასეთების ბოგინი ამ ქვეყანაზე.

  11. ანონიმური

    ამ საქმიდან თუ კობალაძე მშრალი გამოვა და არ დაისჯება.არჩევნებზე გენერალი ვერანაირ ხმას ვერ მიიღებს.სჯობს ჩააყუდონ ციხეში.ამით უფრო მოიგებს ხალხის გულს.

  12. Status quo

    კობალაძის ავტორიტეტი? მერედა, აქვს კობალაძეს ავტორიტეტი?

  13. ანონიმური

    Hsidina danahauli unda daisajos rato unda gaamartlon. Es araa kvekana hemzizgda kvela da kvelaferi.

  14. იოსები იბესოი

    სანამ ეს უფორმო, უგვანო, საჭვო ფასეულობების ბიძო და მთავრობა გვყავს, მანამდე უკეთესს არ ელოდოთ! განათლების და პროფესიონალიზმის სიმცირის გამო, ესენი რეფლექსებით და ინსტიქტებით მოქმედებენ. ცხოველების იერარქიულ სოციუმში ეს ამართლებს. მაგრამ ქართველებს, რომლებმაც ვიცხოვრეთ დავით აღმაშენებელთან, ცოტნე დადიანთან, თევდორე მღვდელთან, ილია ჭავჭავაძესთან, ექვთიმე თაყაიშვილთან… ერთად – სირცხვილია რომ ამას შევყურებთ და ვერ ვხვდებით რა დღეში ვართ. რომ არსებობენ ის ადამიანები, რომლებიც ამართლებენ ამათ უგვანობას

  15. ანონიმური

    ყველა დამნაშავე ციხეშიიიიიი

  16. ანონიმური

    Ver daijert rasac unda imas gaaketebs, ar hejames tvini.

  17. ანონიმური

    Ra kvekanac aahenet, imkit jer sadaa. Ukan vegar daabrunebt unda miehviot.

  18. ანონიმური

    Kvela damnahave garet ra undat cixehi.

კომენტარის დატოვება

თქვენი ელფოსტის მისამართი გამოქვეყნებული არ იყო.