(ვიდეო) – მეწყერმა სახლთან ერთად ხუთი ადამიანი წაიღო – ტრაგედია ხელვაჩაურში – “400 შეტყობინება შემოვიდა უკვე”

ხელვაჩაურში, სოფელ ქვედა ჯოჭოში მეწყერმა სახლი წაიღო, მიმდინარეობს მოქალაქეთა ძებნის სამუშაოები, – ამის შესახებ საქართველოს შინაგან საქმეთა სამინისტროს საგანგებო სიტუაციების მართვის სამსახურის განცხადებაშია ნათქვამი.

მეზობლები ამბობენ, რომ სახლში ოჯახის სამი წევრი იმყოფებოდა.

მათივე თქმით, ასევე, გზაზე მდგომ მანქანაში, რომელიც მეწყერმა ჩაიტანა, სტუმრად მყოფი ორი ახალგაზრდა იჯდა.

ერთ-ერთი მეზობელი ამბობს:

„მიწა რომ ჩამოწვა, იყო დიდი ხმაური, სახლი იყო ბეტონის და მთლიანად ჩაიყოლა. სამი ადამიანია მოყოლილი მეწყერში, ვინც სახლში იყო. 200 მეტრი სიმაღლიდან ჩამოწვა მასა, უცებ ჩაიტანა. ასევე გზაზე იყო „პრიუსი“ და ისიც ჩაიყოლა. ორი ბიჭი იჯდა, სტუმრად იყვნენ“

საგანგებო სიტუაციების მართვის სამსახურის ცნობით, აჭარაში მოსული უხვი ნალექის გამო, საზოგადოებრივი უსაფრთხოების მართვის ცენტრ „112“-ში შესულია 400-მდე შეტყობინება.

შეტყობინებების უმრავლესობა ეხება დატბორილ ქუჩებს, საცხოვრებელი სახლების პირველ სართულებს, ეზოებსა და სარდაფებს. რამდენიმე ადგილას, გზაზე, ჩამოწოლილია მიწის მასა და ჩახერგილია გზა, ადიდებულია  მდინარეები და ღელეები.

სამუშაოებში ჩართულია აჭარის 17 სახანძრო-სამაშველო ჯგუფი, 60-კაციანი შემადგენლობით.

აჭარაში დამატებით ჩავიდა: იმერეთიდან – სპეციალური საშუალებებით აღჭურვილი ხუთი სახანძრო-სამაშველო ჯგუფი 18-კაციანი შემადგენლობით, სამეგრელოს ოთხი სახანძრო-სამაშველო ჯგუფი 19-კაციანი შემადგენლობით და თბილისის სამი სახანძრო-სამაშველო ჯგუფი 20-კაციანი შემადგენლობით.

ყველა შეტყობინებაზე მომხდარია რეაგირება“, – ნათქვამია საგანგებო სიტუაციების მართვის სამსახურის განცხადებაში.

  •  
  •  

კომენტარის დატოვება

თქვენი ელფოსტის მისამართი გამოქვეყნებული არ იყო.