ანტისანიტარია და შიმშილი ვირუსის ანალიზის პასუხის მოლოდინში – ფოტოები პრესტიჟული კლინიკიდან

რა ხდება მაშინ, როცა მსოფლიოში პანდემია მძვინვარებს და შენ სიცხე გაქვს?!


ამბავს მოგიყვებით “ნიუპოსტის” ერთ–ერთი მკითხველის მაგალითზე, რომელმაც საავადმყოფოში არსებული ანტისანიტარიის ფოტოც მოგვაწოდა.
თუ დარეკავთ 112–ზე სიცხიანი, პირველი რასაც გკითხავენ არის – “კორონავირუსიანთან ხომ არ გქონიათ კონტაქტი?”, შემდეგ ყველაფერი ფორმალობაა და გეტყვიან – “დაელოდეთ სასწრაფოს”.

მაშინ, როცა ქვეყანაში პანდემია მძვინვარებს, ალბათ მსგავს გამოძახებებზე სასწრაფოს ექიმებიც სპეციალური აღჭურვილობით უნდა მიდიოდნენ, შესაბამისი კომბინიზონით, ქუდითა და ნიღბით, მაგრამ არა, თვენთან სასწრაფოს ექიმები შემოვლენ, ჩვეულებრივი სამედიცინო ნიღბით, დამცავი ფარით, ერთჯერადი სამედიცინო ქუდითა და ერთჯერადი სამედიცინო ხალათით. ბახილები? – ეგ რა არის?


ეს შემდგომი მოქმედებებიდან გამომდინარე, რაც შემდგომი 36 სთ–იდან 48 საათამდე შესაძლოა გელოდეთ ყველაზე “სასიამოვნო” პროცედურაა.
თუ მათ თერმომეტრზეც დაგიფიქსირდათ სიცხე, გეტყვიან – “უნდა გადაგიყვანოთ”. შეგეშინდებათ, ანერვიულდებით, მაგრამ დათანხმდებით, შემდეგ გეტყვიან, რომ სჯობს საკუთარი “ჯამ–ჭურჭელი” წაიღოთ, განსაკუთრებით ჭიქა და კოვზი. აქ უკვე დაეჭვდებით, შესაძლოა კითხვებიც გაგიჩნდეთ, მაგრამ არ დასვამთ. წაყვებით სასწრაფოს, გზაში გეტყვიან “სჯობს სასწრაფომ მიგიყვანოთ, თორემ თქვენთვითონ რომ მიხვიდეთ 300 ლარი გექნებათ გადასახდელი”, ერთგვარი მადლიერების გრძნობა გაგიჩნდებათ. იკითხავ რომელ საავადმყოფოში მივდივართო და გიპასუხებენ – “სადაც ადგილი იქნება!”.


ამ შემთხვევაში საუბარია “საქართველოს საპატრიარქოს წმიდა იოაკიმეს და ანას სახელობის სამედიცინო ცენტრზე”.


როცა ამ საავადმყოფოში შეგიყვანენ – დარეგისტრირდებით და წაგიყვანენ პალატაში, სადაც თქვენს გარდა კიდევ 5 კაცი წევს, აქედან რამდენიმეს ძალიან ახველებს – არც იფიქროთ, რომ 2 საათში ერთხელ ვინმე ვინმეს სამედიცინო ნიღაბს უცვლის! ამიტომ, უფრო მეტად ანერვიულდებით.


შემდეგ შემოვა ექიმი, თუ ღამეა გეტყვით, რომ დილით აგიღებენ ცხვირ–ხახის ნეცხს, რომლის პასუხიც შესაძლოა საღამოსვე იყოს და “რახან კორონიანის არაფერი გეტყობა, საღამოს გაგიშვებთ სახლში”. გაგეხარდებათ, ნერვიულობაც ცოტა ხნით მიგავიწყდებათ. დღის განმავლობაში ფილტვებზე რენდგენს გადაგიღებენ და სისხლის საერთო ანალიზსაც გაგიკეთებენ.
შემდეგ შემოვა ექიმი და გეტყვით, რომ ორმხრივ პნევმონიაზე აქვთ ეჭვი და ამიტომ საღამოს სახლში აღარ გიშვებენ. ისევ ანერვიულდებით, მაგრამ ამ დროს ანალიზების პასუხი მოგისწრებთ და სხვა ექიმი გეტყვით, რომ ყველა მაჩვენებელი იდეალურია. შესაბამისად, სხვა რა გზა აქვთ, ყველას ავიწყდება ის ფაქტი, რომ ორმხრივ პნევმონიაზე ჰქონდათ ეჭვი, თქვენც მშვიდდებით და ელოდებით საღამოს 10 საათს, სახლში რომ წახვიდეთ რადგან “კორონიანის არაფერი გეტყობათ”.


კვებაზე თავად უნდა იზრუნოთ, წყალი ონკანის, არავითარი დისპენსერი. საპირფარეშო საერთო… თუ არავინ გყავთ საჭმლის მომწოდებელი, დაახლოებით 2 დღე უნდა იშიმშილოთ, რადგან დარწმუნებული იქნებით, რომ საღამოს გაგიშვებენ “კორონიანის ხომ არაფერი გეტყობათ?”.
მოვა საღამოს 10 საათი, გაგიხარდებათ, პასუხების მოლოდინში, გეტყვიან – “წუთი წუთზე ველოდებით”, ძალიან გიხარიათ, გშიათ, გწყურიათ, მაგრამ წუთი წუთზე სახლში უნდა წახვიდეთ… გახდება 11 საათი და “არსით ხმა, არსით ძახილი”, გახდება 00:00 საათი, დერეფანში თავისუფლად გადაადგილდებით, ხალხს თავისუფლად ეკონტაქტებით, არავითარი იზოლაცია, მიუხედავად იმისა, რომ “შეიძლება კორონა გჭირდეთ”.


ასე ლოდინში დაგათენდებათ მთელი ღამე, გათენდება და მშიერ–მწყურვალი იმის მოლოდინით, რომ პასუხი მალე იქნება და საჭმლის გამოძახებას რა აზრი აქვს, ბოლთის ცემას დაიწყებთ დერეფანში. შემდეგ აღმოაჩენთ თქვენს პალატაში ვიღაცის ნახმარ ნიღაბს თქვენს საწოლთან მიგდებულს და მკვდარ მწერებს – ეს ბონუსია.

მოვა დილის 10 საათი და გეტყვიან – “უარყოფითია”, ბედნიერი წამოხვალთ მინუს 4–5 კილოგრამით, დასტრესილი, მშიერი–მწყურვალი, მაგრამ რაც მთავარია “კორონიანს არ გავხართ და არც გაქვთ”, მერე რა, რომ საღამოს მოსასვლელი პასუხი მეორე დღეს მოვიდა, საავადმყოფომ თქვენით სახელმწიფოს ორი დღის ფული წაცინცლა, ექიმს კი თვეში ხელფასის სახით 300 ლარს გადაუხდის!

წყარო – ნიუპოსტი

  •  
  •  

კომენტარი

  1. ანონიმური

    მარაზმი სუფევს ქვეყანაში.

  2. ანონიმური

    Auuuuu

  3. ანონიმური

    სერგიენკო ჩაფლულია ნეპოტიზმში , კორუფციაში და კიდევ მრავალი, შევიდეს კონტროლის პალატა სამინისტროში და რეალურად შეამოწმოს მაშინ ნახავთ!

  4. ანონიმური

    ახალი მინისტრი არის თოჯინა როიალზე!

კომენტარის დატოვება

თქვენი ელფოსტის მისამართი გამოქვეყნებული არ იყო.